Skip to content

Posts from the ‘هوية قبطية’ Category

22
Dec

قصة في القرن الواحد والعشرين توريلك إننا لسة بنتكلم قبطي

تقدر تسمع القصة من هنا

وتقراها وانت بتسمع هنا:
مرة كنت (ماشي) في الشارع ولقيت واحد (كحكوح) (كده) ولابس (جلابية) قلت له صباح الخير يا (حاج) راح رد الصباح .. فسألته تاكل حاجة؟ قال لي هات لي (شوية) (فلافل) وحبة (بسارة) .. جبت له الأكل من هنا ولقيته (بيفرفر) الناس اتلمت ولقيت واحدة بتقول (شي الله) يا عدرا الحقي الراجل، المهم الراجل فاق وبقى أحسن، مراتي اتصلت بيا وقالت لي هات لنا (أوطة) ندهت الواد بيشوي قلت له تعالى ياض يا (مهياص) (يلا) روح اشتريلي 2 كيلو أوطة .. قال لي (إديني) فلوس وأنا أجيبلك إديته وراح جاب .. قلت له إيه (الأرف) (ده)  .. (دي) بايظة كلها .. المهم اخدتها وأنا داخل البيت الواد (بيشوي) ابني عنده 3 سنين أول ما دخلت راح قاللي (بخ) رحت أنا اتخضيت وقلت كده (كخ) ماتعملش في بابا كده تاني، أم(مينا) كانت قاعدة ع الكنبة بتشرب (فيرينا) وعمالة تقول لها (إمبو) (إمبو) .. بعد شوية الجرس رن، لقينا أبونا موسى داخل علينا .. رحت قلت له (إش إش) إيه الزيارة الحلوة دي، أبونا قاللي (كده برضة)؟ ماتجوش القداس الاسبوع ده، قلت معلش يا ابويا الواد (مارتيروس) كان تعبان وعمال (ينف) و(يبربر) ومينا كان (بيدح) علشان الامتحانات .. أبونا قال لمينا طيب (لايمني) على شوية ماية يا واد يا (ننوس) انت و(رشم) معانا الصليب .. وقال لنا (هوب هوب) ع القداس وسر التوبة والاعتراف أوعوا (تكرشوه) أو (تطنشوه) .. أم مينا بقى عزمته على (جبنيوت) أخوها (باخوم) ، في كنيسة مارمينا (بشبرا) .. ده من الأيام الحلوة في حياتي .. وحاللو يا حاللو رمضان كريم يا حاللو .. بكده القصة تبقى (بح).

كل الكلمات اللي بين قوسين هي كلمات ذات أصل مصري أصيل وغيرها كتير واعيين ليه واحنا بنقوله وغير واعيين هاتلاقي إن الكلمة أصلها مصري مش عربية أو تركية أو إيطالية وإن كان أكيد اتأثرنا باللغات دي، لكن المصود إن التواصل بيننا وبين هويتنا ولغتنا ماتقطعش بالكامل.

: تحت هنا كتاب أصل الألفاظ العامية من اللغة المصرية القديمة – الجزء الأول – المهندس سامح مقار https://drive.google.com/file/d/1Qd7sTXYLOt_HNRkhyuGhvecPw2R0vNHO/view

%d bloggers like this: