Skip to content

December 3, 2013

ألحاننا القبطية حلوة بس ………. ! (مقال لمجلة شباب وسط العالم)

by johnanton

يا ترى لو كملت عنوان المقال هاتقول أيه ؟ حاولت أفكر أيه كل الإجابات الممكنة و كانت كالآتى :

طبعا ممكن حد يقولى .. ألحاننا القبطية ، حلوة بس شقية 😀

أو ألحاننا القبطية حلوة بس طويلة،
أو ألحاننا القبطية حلوة بس قبطية،
أو ألحاننا القبطية حلوة بس صعبة ،
أو ألحاننا القبطية حلوة بس مش وقتها،
أو ألحاننا القبطية حلوة بس مش بافهمها،
أو ألحاننا القبطية حلوة بس ماحدش مهتم بيها،
أو ألحاننا القبطية حلوة بس عاوزة وقت،
أو ألحاننا القبطية حلوة بس مش لاقى حد يحفظها لى .

دى ممكن تكون آراء البعض فى الألحان القبطية، و بما إن العدد ده بيتكلم عن الأرثوذكسية وما فيها، و بما إنى من محبى الألحان و من المهتمين بيها و بحفظها، ساعات بيسألنى البعض عن سبب تمسك الكنيسة بالألحان القبطية، و هل لو ماحفظتهاش مش هاخش السما، و هل لو ماتكلمتش قبطى مش هاعرف أسبح فى السما أو مش هافهم بيقولوا أيه، هل لو ماحفظتش اللحن بالقبطى علاقتى بالمسيح هاتفتر؟!

طبعا ده كلام مش منطقى، لأن فى السما هانسبح بلغة جديدة غير معروفة و إن كان الكتاب المقدس و الكنيسة كشفوا لنا عن بعض التسابيح زى تسبحة الملايكة: قدوس قدوس قدوس اللى بنصليها فى لحن أجيوس، لكن برضه مانعرفش ده هايكون بأى لغة ، و حتى الألحان نفسها أقصد النغمة هاتكون جديدة ، طب لو كده ليه بنحفظ فى الكنيسة اللحن القبطى و بلغته القبطية اللى ساعات مش بنفهمها ؟!

n561522496_865341_8333

هل عندك فى البيت أى تحفة أثرية ترجع ل 100 سنة ورا ؟ طيب عندك صورة فريدة فيها البابا كيرلس الرابع ؟ عندك أى صور لعيلتك من حوالى 80 سنة ؟ طيب عندك أى وثائق مهمة أجدادك سابوهالك من 4 قرون فاتت ؟ هل عيلتك ليها نسب كبير أوى و تعرف جدك العاشر مثلا ؟ ، عاوزك تتخيل معايا لو عندك أى حاجة من اللى ذكرتها ، و أوصف إحساسك ، على أى حال خلينى أشاركك إحساسى الصادق ، أنا لو عندى حاجة من دول مش بس أحافظ عليها لأ أنا كمان هاصورها و أحطها على الفيس بوك و أوريها لكل الناس، هو ده الوضع بالنسبة للألحان ” بتاعتنا ” ، عاوزك تحس إن اللحن القبطى ده ملكك ، ده ميراثك اللى أجدادك سايبينه ليك و بقى ملكك ، حاجة بتضرب جدرك فى الأرض تلاقيه مش أقل من 2000 سنة … فى بعض البلاد الأوروبية لما بيت يعدى عليه 100 سنة أصحاب البيت بيبقوا فرحانين و حاسين إنهم ناس ليهم جدر و واقفين على أرض صلبة.

مش بس بنحافظ على الألحان علشان هى تراث رائع لن يتكرر ، لكن هى كمان اللى حفظت للكنيسة و لشعبها الإيمان السليم ، يعنى على سبيل المثال امسك الثيؤطوكيات و ركز فيها هتلاقى نفسك دخلت الكلية الإكليريكية من غير ما تشعر ، أو اقرا لحن “بشفاعات والدة الإله” بالراحة و تدريب : طلع منه 8 عقائد مسيحية.

مش بس كده، دى كمان جواها معانى عميقة جدا ماشوفتش زيها، و كمان الكلمات تلاقيها ماشية مع النغمة، لأن واضع اللحن و مؤلفه كان بيحط النغمة علشان تعبر على الكلمة، جرب و انت فى التسبحة و بتقول لحن “هوس إيروف” تلاقى كلمة شا إينيه مش عاوزة تخلص عمالين نكرر فى الجزء ده كتير، عارف ليه ؟ لأن شا إينيه معناها إلى الأبد فعبر عنها بالطريقة دى (شرح المهندس / جورج كيرلس)

end

كمان اللحن القبطى بيعبر عن هويتنا القبطية، و بيقول إننا أقباط ما احناش وافدين بل نحن شعب مصر الثابت فيها ، فى وقت بيكون البعض عاوز ينكر عنا الهوية المصرية .

بالنسبة لموضوع اللغة القبطية، و ليه بنصلى بيها، ينطبق عليها بعض من اللى قلناه قبل كده، لكن هاضيف جزء و هو: سمعت مرة أوبرا أصلها إيطالى بس اتغنت بالعربى ، قفلت على طول، عارف ليه ؟ لأن اللحن وُضع على كلمات و حروف ساكنة أو مد بشكل معين ، ماينفعش أبوظ الموسيقى و أعرب اللحن ، كل حاجة بتبقى وحشة جدا على الودن ، طيب نفهم إزاى؟ ، فى كذا طريقة أسوأهم بس أسهلهم بالنسبة للبعض هو تعريب اللحن و بناء على ما عرضته أعترض على تعريب اللحن لأنه بينتج عنه لحن مشوه لا علاقة له بالأصل ، ممكن أتابع فى الخولاجى أو على شاشة العرض و أصلى بدل ما أفضل اتأفف و أشعر بالملل ، طبعا فى حلول استراتيجية للمدى البعيد زى مثلا فتح مدرسة للشمامسة تدرس الألحان و القبطى و الطقس زى مدرسة كنيستنا للشمامسة ، كمان فى أسباب تانية تتعلق بالحفاظ على اللغة القبطية زى ترجمة الكتاب المقدس أو الأدب القبطى المحفوظ فى المخطوطات و اللى فيها كنوز من أعمال و صلوات و كتابات الآباء القديسين.

بالتالى لو حفظت لحنك الجميل و أنا أقصد أقول “لحنك” لأنه ملكك ، و اللحن = كنز ، فانت بتملك كنز ، احفظه ليك و صلى بيه و عيش معاه و حافظ عليه للكنيسة و لأولادك ، كتير أسمع من بعض الآباء و الأمهات إنهم مكانوش بيحبوا يحفظوا الألحان لكن بيوصوا و بشدة على أن أولادهم يحفظوها و يصلوا بيها لأنهم شعروا بقيمتها فى الصلوات الليتورجية.

أتمنى أن نبتعد عن ثقافة التخلى تحت إدعاء “الناس عاوزة تصلى” لأنى ممكن أعمل الاتنين مع بعض … بس عاوزين حماس و فهم لما بين أيدينا من كنوز عظيمة.  68666_496610260406945_2009990409_n

أقولك على سر، لازم تصاحب اللحن القبطى و تحبه و تسمعه فى البيت و تتأثر بيه، و على طول هتلاقى نفسك بتكون صداقة معاه و بتزود من أصدقائك من الألحان، يا سلام لو حفظت مجمع التسبحة و كان عندك مشكلة، رحت على طول صليت مجمع التسبحة، فتلاقى فعلا إن اللى معاك أكتر من اللى عليك و تبقى مبسوط إن كل دول بيصلوا علشانك عند المسيح إلهك.

أخيرا، عن تجربة، فى بداية حفظ أى لحن تلاقيه صعب لكن لما تخلصه و تحفظه تلاقيك بتحبه و عاوز تقوله على طول و تفرح أوى لما تلاقيهم فى الكنيسة بيقولوه .

الألحان القبطية اللى يحبها تحببه هى فى ربنا و اللى يحفظها تحفظه هى فى حضن الكنيسة.

401880_496588953742409_319636662_n

Read more from Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Note: HTML is allowed. Your email address will never be published.

Subscribe to comments

%d bloggers like this: