Skip to content

Archive for

17
May

خبير سموم .. أمين و مهموم

يحكى أن …. مرة كان فى واحد متخصص فى السموم خبير سموم يعنى ، و من دراسته و علمه و الأبحاث اللى بيعملها تطور جدا فى الموضوع ده و بقى لديه خبرة واسعة جدا فى اكشتاف السموم اللى موجودة فى الأكلات … و بسبب احترافيته و خبرته الواسعه دى طلبه أحد الملوك علشان يشتغل عنده و عمل له اختبارات كثيرة علشان يثق فيه ، و بالفعل نجح فيها كلها و كان عايش مع الملك فى قصره لأن عمله يحتم عليه كده و كان الملك ده غنى جدا … و بعد فترة من عيشتهم مع بعض .. الملك حبه  جدا و هو كمان كان فعلا مخلص للملك جدا .. لكن كان فى مستشار ضمن حاشية الملك و كان شرير جدا ، و الملك كان بيحبه برضه لأنه (الملك) طيب مش بيظن السوء فى حد فاستأمنه على حياته و كان بياخد آراءه فى كثير من الأمور ، و بقى الراجل الشرير ده من الناس المهمين فى قصر الملك بدون علم الملك بشره القبيح و بخساسته الرديئة … و فى يوم من الأيام اتفق المستشار الشرير مع أمير مكار تانى إنه يسلمه الملك و هو عليه إنه يموت الملك بشرط إنه ياخد وضعه بشكل أكبر فى المملكة !! و لأن الملك كان بيحب المستشار زى ما قلنا .. عمره ما فكر إن يكون موته فى يوم من الأيام على إيديه !! و قدر هذا المستشار الشرير بطريقة مكارة جدا ماحدش عرف يلاحظها أنه يحط سم فى الأكل اللى بيقدموه للملك ، لكن وجود خبير السموم المخلص للملك و الوفى جدا له كان له أثر ، فاكتشف الحيلة دى .. و لأنه كان بيكشف على الأكل من فترة لأخرى اكتشف إن الأكل بالفعل فيه سم !!!

a (16)

حذر الملك و قال له خد بالك : الأكل مليان سم يا مولاى!!
الملك : الأكل جميل جدا و شكله أحلى حاجة فيه
خ السموم : عمر الشكل ما كان بيعبر أبدا عن سلامة الأكل يا مولاى
الملك : بس مفيش حد فى حاشيتى بيكرهنى
خ. السموم : للأسف يا مولاى فى ناس عندها مصلحة من ورا قتلك و بتكرهك و علشان كده أنا موجود هنا أرجوك أسمع لنصيحتى
الملك ( محتدا ) : إنت ازاى تقول كده .. بتتهم الناس و كمان بتشكك فى وفاءهم تجاهى ، مالهم كل اللى فى القصر ما حلوين ، ” كلنا واحد فى القصر ” و عمر ما حد هايفرقنا أبدا !!!
خ. السموم : فى اللحظة دى أنا مايهمنيش إنت هاتقول عنى أيه و هاتتهمنى بأيه .. لكن أنا يهمنى سلامتك و حياتك و عارف و متأكد جدا إن الأكل فى سم جلالتك .. أنا “””””خبير سموم “”””” و ده تخصصى اسمع لكلامى و إلا هاتمووت !!!
الملك (ينادى على الحراس ) : احبسو الراجل ده أنا وثقت فيه بس طلع معقد و هايخسرنى أحبائى ، أنا هاكل من الأكل ده ، خلينا ناكل و إحنا بنحب بعض كلنا و مفيش حد يوقع بنا أبدا !!!
و بالفعل أكل الملك ….. !!!!!!!
و أكيد عرفت النتيجة !!!

a (33)
لن أعلق تعليق طويل عريض …. لكن هذه هى فضيلة التمييز التى يعطيها الله للبعض حتى ينقذوا البعض الآخر من سموم الهراطقة و البدع مهما ظهر أن الذى يقدمه هؤلاء المنحرفين عن الإيمان شكله براقا و لامعا بل و مدهشا و قد يخدعك العدد الكثير فلا تنخدع ففى زمن من الأزمان كاد العالم كله يكون أريوسيا ( يعنى قالوا إن المسيح مش مساوى للآب فى الجوهر .. المسيح – مخلوق ) و كان فى وقت مكانش فى حد بيعبد ربنا فى العالم كله غير أسرة واحد هى أسرة نوح !!!!!

أَيُّهَا الأَحِبَّاءُ، لاَ تُصَدِّقُوا كُلَّ رُوحٍ، بَلِ امْتَحِنُوا الأَرْوَاحَ: هَلْ هِيَ مِنَ اللهِ؟ لأَنَّ أَنْبِيَاءَ كَذَبَةً كَثِيرِينَ قَدْ خَرَجُوا إِلَى الْعَالَمِ. ( 1يوحنا 4: 1)

اسمع معى القديس بولس الرسول ناصحا تيموثاوس :

أنه سيكون وقت لا يحتملون فيه التعليم الصحيح، بل حسب شهواتهم الخاصة يجمعون لهم معلمين مستحكة مسامعهم ، فيصرفون مسامعهم عن الحق، وينحرفون إلى الخرافات ، وأما أنت فاصح في كل شيء. احتمل المشقات. اعمل عمل المبشر. تمم خدمتك(2 تى 4 : 3 ، 4 ، 5)

تأليف : جون أنطون
رسومات القصة : مينا أنطون

A (27)

%d bloggers like this: