Skip to content

Archive for

16
May

أنا عندى تكييفان – تقال على وزن أنا عندى بغبغان

راجع الأغنية الأول :

(أنا عندى تكييفان .. تلاتة و نُص حصان) 2

يسقعوا ليا الأوضة .. و فى دقايق معدودة
يروح الحر هولندا .. و السقعة فى كل مكان
لدرجة إنى بابقى .. منه متلج بردان

(و أتارى فى التكييفان .. Option للسُخن كمان) 2

لما السقعة تيجى تانى .. و أقول منها آه يانى
لكن تكييفى خلانى .. دفيان و كمان حرّان
و عمره ما هيبوظ منى .. ده صُنع فى اليابان

(و بازعل لما فاتورته .. بتجيلى بالميات
و ده اللى بيخلينى .. مخنوق منه ساعات)2

و لما الكهربا تقطع .. بفرهد منه ساعات
لكن ماستغناش عنه .. و أقعد بالساعة جنبه
إن شالله ينقط ماية .. تحتيه الجردل هات
ما هو أًصله بيخلينى .. فى سعادة و انبساط

(راح نطق البغبغان .. و قاللى اصحى يا إنسان) 2

ده انت واحد متدلع .. ده بلاد تانية بتولع
م الشمس و من حرارتها .. فى النوبة و السودان
و ناس لابسة الدولاب .. م السقعة فى اليونان

( اشكر و ماتتذمرشى .. ده ناس تانية فى عذاب
يشتغلوا فى شمس قوية  .. لقفاهم جه ألتهاب ) 2

و ناس فى السقعة  قالعة .. علشان اللبس داب
و انت قاعد تتكيف .. تاخد دُش و تتليف
يا أخينا حس مرة .. باللى معندوش و لا جاب
تكييف من عند Carrier .. لأن معندوش باب

(فهمت البغبغان .. و اللى قالهولى كمان) 2
بصيت كتير حوالى .. حستها نعمة غنية
أنك قاعد متكيف .. ولا بردان و لا حران
علشان كده نشكر فضله .. و نشفق ع الغلبان

 

%d bloggers like this: