Skip to content

Archive for

5
Feb

يونان 1

 

قصة يونان و نينوى .. بتعلمنا دروس كتير

دى حكاية بسيطة إنما .. فيها مضمون غالى و خطير

 نفسى تقوللى يا ابونا يونان .. احساسك أيه جوة الحوت ؟

و تقوللى نجيت منه إزاى .. و ازاى طلعت حى ما تموت

 هاقولك يا سيدى بص و ركز .. دى حكاية عجيبة تفوق العقل

لما رمونى من السفينة … حسيت إن لابد مصيرى القتل

 موجة ترمينى و تانية تشيلنى … و بقيت يعنى فى عرض البحر

و فجأة لقيت صوت عظيم .. قلت خلاص خلاص لا مفر

 صوت بيزمجر زى القطر … مش فاهم أيه اللى بيحصل ؟!

لقيت نفسى باتشال و اتحط .. خايف جدا لا الموت يوصل

 بصيت .. لقيت الدنيا ضلمة .. مش عارف أنا ميت و لا حى

أنا فى حلم و لا ده الجحيم ؟؟ .. اتمنى ربى يقوللى أنا جاى

 أدركت إنى لسة عايش .. مش فاهم ازاى دى حاجة غريبة ؟؟

أتارى ربى بعتلى حوت .. يحفظنى لا اغرق و تبقى مصيبة

 أنا قلت أنا مت أكيد .. أتارى الحوت كان سبب نجاتى

  تلات أيام قعدت فيه .. افكر و اراجع حساباتى

 تخيل .. ده أنا كنت فى ضلمة .. بس كنت عايش باتنفس

  تلات أيام ماكلشى لقمة .. أصلى للأكل مش متحمس

 اللى هاممنى اقدم توبة .. لعل ان ربنا يقبلنى

و اسمع كلامه اللى يقوله .. دى حكمته جميلة و ما تتعبنى

 كتير بنبص لمشكلاتنا .. إنها كارثة دى زى الموت

أتاري ربنا يسمح بيها .. دى هى المنقذ زى الحوت

 فيها بنصلى و فيها بنصوم .. و تخلينا نعيد حساباتنا

و منها ناخد بركة كبيرة .. تبقى خبرة تدوم لحياتنا

Image

 

%d bloggers like this: